رولا خرسا
1-ما تخافيش.. آه ما تخافيش.. ما تعيشيش حياتك مرعوبة من ضغوط المجتمع عليكى إنك ما تتجوزيش أو إنك تتطلقى أو مين حيقول إيه أو مين حيعمل إيه.. وبعدها ضغوط إنك تكونى زوجة ما حصلتش وست بيت هايلة وأم مثالية، إنتى مش آلة.. إنتى بشر.
2- حبى نفسك
3- مش بتحبى ما تتجوزيش ولو بقى عندك دشليون سنة.. مش جواز للجواز وبس تانى وتالت ما تخافيش واعملى اللى يسعدك.
4- لو مش سعيدة ما تكمليش.. لا عشان الأولاد.. ولا خوفًا من المجتمع لأنك لو كملتى تعيسة حيلوموكى أو حيقولوا لك دا اختيارك ولو إطلقتى حيلوموكى برضو.. ففى كل الأحوال مش حترضيهم ولا حترضى أهلك يبقى على الأقل ارضى نفسك.
5- حبى نفسك
6- السن مجرد رقم.. ما تسيبيش حد يقولك كبرتى.. على لبس أو على قرار أو على أى تغيير
واعملى اللى نفسك فيه الحياة قصيرة جدا.
7-حبى نفسك
8- عيشى صح يعنى لازم شغل لازم بيت بس، الأهم لازم فسح وانبساط.. وما تتحوليش لماكينة روتين وتدورى فى فلك البيت والشغل.
9- حبى نفسك
10- ما تبخليش على نفسك بحاجة أبدا.. ما تقوليش مش مهم أنا...لا أنتى مهمة لأنك لو حطيتى نفسك فى الأخر كل اللى حواليكى حيحطوكى فى الأخر..
11- حبى نفسك
12- مفيش زوج مثالى ولا فيه أهل مثاليين ولا فيه أولاد نازلين من الكتالوج ولا أنتى نفسك محصلتيش يبقى تحبيهم من غير ضغوط.
13- حبى نفسك
14- صحتك صحتك صحتك.. مفيش حاجة باقية لك غيرها
15- حافظى على شكلك فى كل مراحل عمرك.. مش عشان أى حد غيرك.. عشان أنتى تبقى مبسوطة بنفسك .. ومش مهم وزنك كام ولا لون شعرك أو عينيكى.. المهم تبقى مرتاحة بشكلك وهيئتك.
16- خلى يوميًا يكون عندك وقت لنفسك تعملى فيه أى حاجة تسعدك.. كوافير.. مسلسل.. كتاب..رقص.. خروجة مع صاحباتك.
17- ما تقبليش بأقل مما تستحقى.. واعرفى قيمة نفسك صح
18- ما ترضيش بأى نوع عنف لا لفظى ولا جسدى ولا تقليل قيمة أو تريقة..
19- لازم تعرفى أن أغلى وأهم حاجة ممكن تقدميها لنفسك وللى بتحبيهم الحب.. مهما قسوا عليكى.. اللى من دمك لازم فى الأخر حيرجعوا لك.. مهما بعدوا عنك.. وأولادك لو خدتهم الحياة أكيد فى يوم حيوحشهم حضنك زى ما هو واحشك.
20- أهم حب فى حياتك حبك لنفسك .. يعنى إنك تتصالحى مع نفسك، بعيوبك، بدماغك.. اللى بيحبك بجد حيحبك زى ما أنتى وحيفضل جنبك وعمره ما حيسيبك.. وأنتى أول حد مش لازم يسيبك.. تحية لكل ست فى الدنيا بتعافر من غير سند لا أب ولا زوج ولو عندها أولاد فأكيد معتمدين عليها.. تحية لكل ست وحيدة لسه واقفة قوية مبتسمة فى وش الحياة رغم أنها أكتر حد محتاج حضن وأيدين تشيل عنها شوية.
كل لحظة وكل ست فى الكون بخير شايلة ومستحملة ومكملة..
تحية لكل ست لسه عندها قدرة تحب وتحلم وما نسيتش بعد مرور السنين وصعوبتها أنها أولا وأخيرا ست.
