محمد عبدالحافظ
لو حب واحد فيهم يشتم أخوه بيقوله يا حيوان وإحنا مظلومين.. ولو خيرونا ما نرضاش نبقى بنى آدمين، بيتهمونا إن إحنا عايشين فى غابة.. وبينسوا أن إحنا عالطول متصالحين.. وهُمّا عايشين فى نعيم لكن دايما متخانقين.
بنّام فى الشمس والمطر والحر والبرد وعلى الرمل وعلى الطين وفى كل مكان مرتاحين ومش متذمرين.. وهمّا عايشين على حرير فى حرير وبيناموا فى التكييف لكن دايما قلقانين وعيونهم سهرانين.
بيكلوا لحمنا ولحم بعض وبرضو مش شبعانين.
سيبونا بقى فى حالنا يابنى آدمين.. إحنا بنعيش راضيين وبنموت كمان راضيين.. لا عمر الحمار فينا عايز يبقى أسد ولا البقره بتحلم تبقى غزال ولا الكلب بينونو ولا القطة بتهوهو.
والله لنقوم بثورة ونرفض بأعلى صوت ونكتب على حيطان الميادين: نفخر إن إحنا حيوانات مش بنى آدمين.
