شوية كرامة

شوية كرامة على حبة ضمير، وعليهم عصير الصراحة، بيعملوا عجينة الإنسانية.. لا عند عطار ولا جواهرجى ولا صيدلى تلاقيهم، ولا تقدر تشتريهم بكنوز الدنيا ديه.. لا بالكيلو يتوزنوا ولا بالمتر يتقاسوا.. دول بيبقوا خلطة من عند خالق البشرية.. وما حدش بيورثهم ولا حتى بيتعلمهم.. لا بتشوفهم ولا تلمسهم لكن أكيد بيتحس بيهم.

ولو روحت فى عيادة التجميل ما تقدر تفوز بيهم.. مُمكن تلون عينيك أو تصغر مناخيرك، مُمكن يخلوك تخين أو يحسنوا تضاريسك، وجايز كمان يستبدلوا كل حتة فيك ويغيروك بالكامل من بره، لكن مُستحيل يزرعولك حبة ضمير أو حتة كرامة أو شوية إنسانية..

يعنى يا مسكين هتبقى جميل من برة وهتفضل بردوا مشوه زى ما أنت من جوه..

إياك تصدق أن الضمير بيصحى أو بيموت ده يا إما موجود أو مش موجود.. زى الكرامة ما ينفعش تبقى ناقصة حتة.. يعنى يا عندك كرامة كاملة.. يا إما تبقى منزوعة منك..

ما تقلقش لما تعجز وتضعف بحكم سنك وتتغير ملامحك.. اطمن كرامتك وضميرك هيفضلوا زى ما هُمّا..

ما أنا زى ما قولتلك يا إما بتتولد وتعيش بيهم.. يا بتعيش وتموت من غيرهم.