رولا خرسا
كان الضحك تصرف غير مهذب.. تربية كئيبة جدًا الحقيقة.. مفيش أحلى من إنك تضحك.. تمت تربيتنا على إننا لازم نتكلم جد طول الوقت، "ما تهزرش الموضوع جد" مع إن أحلى حاجة إنك تهزر أما يكون الموضوع جد قوى، لأنك بتخفف من حدة جدية الموقف.
ليه الناس متخيلة أما تبقى بتتكلم بجد إنك لازم تكشر كدة وتطلع كلام عميق عميق؟ ليه الناس معتبرة إن الهزار تفاهة؟ وإن الضحك روقان بال؟ مع إنك ممكن تبقى عندك مشاكل الدنيا بس تحاول تضحك أو على الأقل تبتسم.. أنا مقتنعة إن فى معظم الأحيان الضحك معدى تمامًا، مثل الملل الذى يمثله التثاؤب، عندما تتثائب أمام أحد فإنه يتثائب أيضًا.. نفس الوضع فى معظم الأحيان مع الضحك.
ألم يحدث معك أن ضحكت على أمر تافه جدًا ضحكة كبيرة دون سبب؟ أو جاءت لك كريزة ضحك دون سبب؟ تضحك باستمرار دون توقف ودون سبب قوى وأنت تعلم داخلك أن الموقف لا يستحق الضحك عليه لهذه الدرجة؟
تفسيرى أنك تكون بحاجة لجرعة ضحك فتنتهز أى فرصة مهما كانت تافهة كى تعبر عن حاجتك هذه.. الضحك شفاء من كل داء.. دور على فيلم كوميدى.. على نكت حتى لو هايفة.. اتمرن كدة إنك تبتسم معظم الوقت.. انوى كدة إنك تبقى جاد فيما تقدمه وتفعله، ولكن اعجن أو اخلط كل دا بضحكة.
الضحك بيخلى الأجواء حولك الطف مفيش أحلى من الناس اللى بتضحك فى وشك.. اضحك بسبب ومن غير سبب.. اضحك وانت فى عز حزنك يمكن الحزن بتكسف منك.. اضحك فى عز المشاكل والأزمات حتلاقى المشاكل صغرت حجمًا.
اضحك للدنيا مهما كنت مهموم حتضحك لك.. الدنيا مش بتحب اللى يكشر فى وشها.. اضحك بسبب وبدون سبب.. يا رب يملا كل أيامكم ضحك من القلب.
