رولا خرسا
ولكن للأسف دايمًا بنفكر فى العلاقة من طرف واحد... الأم تدى أيه لأولادها.. الاولاد بياخدوا الأم كأمر مضمون مهما عملوا فيها.. يعنى تلاقى الأولاد يعملوا ما بدا لهم وعارفين إن أمهم حتسامح.. يبعدوا وكل واحد عنده حياته ومتأكدين إن حضن أمهم مستنيهم مع إنها أكيد حاسة إنهم واحشينها ووحشها حضنهم وضحكهم قوى.. وممنوع تشتكى لأنها حتسمع كلام من نوعية "سنة الحياة" أو "الأهل يعنى عطاء" وما ينفعش تعترض.. لأ طبعًا.. أنا حاعترض.. إحنا لينا عليهم حقوق كمان.. مناسبة الكلام دا إن أمى وأختى وصديقتى كل واحدة منهم فى أوقات مختلفة استفردت بى وقالت لى نفس ذات الجملة إلى بستفزنى جدًا: "إحنا مش لازم نتوقع من أولادنا حاجة دورنا ندى وبس".. وردى لكل حد فيهم كان "مش موافقة أنا كمان كأم محتاجة أحس إن أولادى بيدونى هم كمان".. الموضوع فعلًا مستوقفنى: مين إلى حط نظرية إن العطاء مقصور على الأهل فقط؟.. المطلوب ندى حنية ندى اهتمام ندى فلوس ندى وقت.. طيب ما أكيد طبعًا إحنا كأمهات بندى دا بشكل غريزى ومن غير ما نفكر.. الأهل لو يقدروا يدوا عينيهم لأولادهم أو الكليتين مش كلية واحدة حيدوا.. الأولاد بقى معتمدين على الحب دا، ومعنديش مشكلة دا حقهم.. يعنى بلاش أى حد يقرأ المقال دا يقعد يحكى لى عن إن دا الطبيعى والله عارفه..
أنا بس بسأل مجموعة أسئلة منها: أنا كأم حقى إيه؟؟ أو حقوقى إيه؟؟ هل مطالبة إنى دايمًا كده أدى واقعد مستنية أما يفضوا يسألوا عنى؟ أو يزورونى أو يكلمونى؟؟؟ ليه أول ما بيكبروا شوية كل واحد فيهم بيعمل لنفسه حياة بعيدة عنى؟ لا ده زيادة مع إنى كنت دايمًا بتنرفز من مثل "يا خايبة ربى للغايبة" بس معنديش مانع لإن الزواج بقى سنة الحياة ويا رب يسعدهم جميعًا.. وعلى فكرة أنا أم "مش خنيقة" خالص.. يعنى من طفولتهم وأنا أديت لأولادى حرية حركة وتعبير وتصرفات وسفر وكله.. ولكن أول ما انطلقوا انطلقوا بعيد وبقيت بشوفهم فى المناسبات..
لكل أم أولادها لسه صغيرين احضنوهم قوى واستمتعوا بكل دقيقة معاهم.. حيكبروا بأسرع مما تتخيلوا.. وبعد ما كنتم زهقانين من دوشتهم حتدوروا على أى فرصة لقاء معاهم... وتانى بقول محدش يقول لى سنة الحياة..
